हङकङमा क्रियाशील नेपाली समुदायको साझा खेल संस्था Baglung Sports Hong Kong ले आगामी १७ फेब्रुअरी २०२६ मा २६औँ खुल्ला महिला तथा पुरुष भलिबल प्रतियोगिता आयोजना गर्ने भएको छ। प्रतियोगिता Tuen Mun, Hong Kong मा सञ्चालन गरिने जानकारी संस्थाका कोषाध्यक्ष शिब श्रीसले दिनुभएको छ।
संस्थाले विगत वर्षहरूदेखि निरन्तर रूपमा खेलकुद कार्यक्रम आयोजना गर्दै आइरहेको छ। विदेशमा बसोबास गरिरहेका नेपालीहरूलाई गाउँघरको झल्को दिलाउने, आपसी सम्बन्धलाई अझ सुदृढ बनाउने तथा युवापुस्तालाई खेलकुदप्रति आकर्षित गर्ने उद्देश्यले प्रतियोगिता आयोजना गर्न लागिएको जनाइएको छ।
यस वर्षको प्रतियोगितामा महिला तर्फ ६ टिम र पुरुष तर्फ ७ टिमले दर्ता गराइसकेको आयोजक समितिले जनाएको छ। दर्ता भएका टिमहरूबीच प्रतिस्पर्धा रोमाञ्चक हुने अपेक्षा गरिएको छ। खेलकुदमार्फत स्वास्थ्य, अनुशासन र सहकार्यको भावना विकास गर्ने लक्ष्यसहित कार्यक्रम सञ्चालन गरिने बताइएको छ।
आयोजकका अनुसार प्रतियोगिता व्यवस्थित, मर्यादित र प्रतिस्पर्धात्मक बनाइनेछ। विजेता तथा उपविजेता टिमलाई ट्रफी, मेडल तथा प्रमाणपत्र प्रदान गरिने तयारी गरिएको छ। साथै उत्कृष्ट खेलाडीलाई विशेष सम्मानसमेत गरिनेछ।
विदेशी भूमिमा पनि गाउँघरमा जस्तै सामाजिक र खेलकुद गतिविधि सञ्चालन हुनुले समुदायबीच एकता, सद्भाव र सहकार्यको भावना अझ बलियो बनाउने विश्वास गरिएको छ। बाग्लुङ स्पोर्ट्स हङकङले आगामी दिनमा पनि यस्ता रचनात्मक कार्यक्रमलाई निरन्तरता दिने जनाएको छ।
प्रतियोगितामा उपस्थित भई कार्यक्रमलाई सफल बनाउन हङकङमा रहेका सम्पूर्ण नेपाली दाजुभाइ तथा दिदीबहिनीलाई आयोजकले हार्दिक आग्रहसमेत गरेको छ।
